Vawiin September ni 21, 2012 hian Mizoram University hnuaiah college hrang hrangte inelna Inter College Football Final khelh a ni a, inkhel.com ah pawh kan lo post tawh thin a, He football tournament hi Thuamluaia Mual, Lungleiah khelh a ni a, mahse Semi Final ah buaina a chhuah tak avangin khelh chhunzawm a ni ta lo.
 
Tichuan Mizoram University Sports Board chuan Semi Final-a inkhel Govt. Lunglei College leh Govt. Aizawl College te kara buaina kha an chingfel ta a, Govt. Lunglei College chu disqualified niin, Govt. Aizawl College chuan Final an lut ta a. Vawiin hian AR Lammualah Govt. Aizawl College leh Govt. Champhai College te chuan final an khel ta a. Govt. Aizawl College hian 4-2 in hnehna an chang ta a, 2012 Inter College Football champion an ni ta a ni.
 
Govt. Aizawl College tan hian Mama, Dinthar FC-a khel mek chuan goal hnih a khung a, Michael-a leh Puia ten goal khat ve ve an khung bawk a. Inkhel hmuhnawm tak a ni a, Govt. Aizawl College hian si hnih faiin hma an hruai ren rawn a, Govt. Champhai College in an rawn draw leh a. Mahse hun tawp dawn minute 10 la awmin Govt. Aizawl college hian goal hnih lai an khung ta a. Tichuan Govt. Aizawl College Inter College Football-a champion ngun ber nihna an hauh chho ta zel a ni.
 
Govt. Lunglei College chu disqualified an nih tak avangin 3rd place khel tur an awm ta lova, Semi Final-a Govt. Champhai College in an lo hneh tak Govt. Hrangbana College te chu pathumna an ni ta a ni.
 
Govt. Aizawl College coach Nicky Malsawmtluanga chu inkhel.com chuan kan kawm nghal a, an champion tak danah a lawm em em thu sawiin,"Football level sang tak takah ka lo khel tawh thin a, Mizoram ah pawh 1st division ah pawh ka lo khel ve tawh thin. Tin, Mizorama tournament lian tak takah pawh team ka enkawl nual tawh bawk.
 
Mahse College Football ang em em a boruak sang hi Mizoram Football ah a lo awm lo a ni. Thalai rual an ni a, College tan tupawhin an pe na a, thisen lum an niin engmaw hlekah buaina chhuak vak thei a ni reng a. Hetiang em em a Football boruak sanna hi ka la tawng ngai lo a ni. Tin, player te pawh hi Mizoram Club liana khel an ni deuh fur bawk a, hei vang hian Football level hrim hrim pawh hi a hniam thei lo hrim hrim.
 
Heta kan champion thei hi ka lawm khawp mai. Kan chawl ren rawn a, Final khel tur kha kan ni leh ta mai si a, ni 5 chhung chauh kan practice hman a, Lungleia kan game kha kan phak lo nasa khawp mai. Champhai College khan nasa takin min fight a, an khel tha a, keini aiin an fit zawk bawk. Mahse hun tawp lamah vanneihna kan chang ta a ni. Kan lawm tak zet zet a ni," tiin a sawi.